Жазушылар ішкорпусы – проза және драма жанрындағы көркем шығармалардың аннотацияланған электрондық қоры және жазушының көркем тілін танытатын көріктеуіш құралдардың базасы. Жазушы мәтіндері ішкорпусы арқылы оқырман қазақтың роман, хикаят, повесть, әңгіме, мысал, новелла, пьеса жанрлық түріндегі көркем туынды жайында толық ақпарат алуға және сол шығарманы онлайн оқуға мүмкіндік алады. Жазушы мәтіндері ішкорпусына қазақтың 100 жазушысының көркем шығармалары енгізіліп, олардың көркем туындыларына метабелгіленім (жазушы туралы толық мәлімет беріледі) қойылды. Жазушылар ішкорпусы мәтіндер базасының көлемі – 10 миллион сөзқолданыс. Қазақтың көркем әдебиет стилінде жиі кездесетін эпитет, теңеу, метафора мен тұрақты тіркестер, жазушы қолданысындағы мақал-мәтелдер мен нақыл сөздер оқырманның іздеуіне оңтайлы болу үшін жеке-жеке іздеу ұяшығына берілді. Жазушы мәтіндері ішкорпусы сөз, метабелгіленімдер (автор, шығарма атауы, жанр, хронотоп, аудитория жасы), көріктеуіш құралдар және көркем тіл бойынша іздеу жасайды.